"Rolan Garros" chempioni 5 setda aniqlandi

Hozirgina erkaklar o'rtasidagi yakkalik musobaqasining chempioni aniqlandi. Hal qiluvchi final uchrashuvida dunyoning uchinchi va to'rtinchi raqamli tennischilari - ispaniyalik Karlos Alkaraz hamda germaniyalik Aleksandr Zverev o'zaro to'qnash kelishdi. 

To'rt soatu 20 daqiqa davom etgan bahs g'olibi 5 set natijasiga ko'ra aniqlandi. Alkaraz 6/3, 2/6, 5/7, 6/1, 6/2 hisoblarida g'alaba qozonib, "Rolan Garros" bosh sovrinini qo'lga kiritdi. Bu bilan u tennischilarning o'zaro uchrashuvlaridagi hisob muvozanatini ham tiklab qo'ydi - 5:5. 

Final uchrashuvi statistikasi:

Karlos Alkaraz - 3 ta eys, 6 ta qo'shxato, 9 ta breyk

Aleksandr Zverev - 8 ta eys, 6 ta qo'shxato, 6 ta breyk

Ispaniyalik tennischi faoliyatidagi uchinchi "Katta Dubulg'a" turniri tituliga ega chiqdi. Parij kortlaridagi ikki haftalik mehnat 21 yoshli Karlosga 2000 reyting ochkosi va 2 million 400 ming AQSH dollari miqdoridagi mukofot pulini taqdim etdi. U ertaga elon qilinadigan ATP reytingida dunyoning ikkinchi raketkasiga aylanadi. Vice-chempion Zverev esa 1300 ochko va 1 million 200 ming dollarga ega bo'ldi.