Ronaldu Saudiya Arabistoni klubida yiliga 172 mln ishlab topadi

Portugaliyalik yulduz Saudiya Arabistonining "Al Nassr" klubidan tushayotgan taklifni qabul qilish arafasida. Agar 37 yoshli forvard ushbu bitimga imzo cheksa, yiliga qariyb 172,9 mln evro ishlab topishi mumkin bo'ladi. Bu futbol tarixidagi eng yirik kelishuvga aylanadi. 

Ronaldu yozda ushbu klubning qiziqishiga rad javobini bergan edi. Sababi u CHempionlar Ligasida ishtirok etadigan biror top-klub safiga borib qo'shilmoqchi edi. Bu amalga oshmagach, Osiyo qitasi vakilining taklifini qabul qilgan ko'rinadi. 

Ronalduning yangi bitimi 2,5 yilga tuzilishi aytilmoqda. Evropa va MLS'ning biror klubi bunday yirik bitim taklif qila olmaydi. 

"Al Nassr" Saudiya Arabistonidagi eng muvaffaqiyatli jamoalardan biri hisoblanadi. Ular 9 bor mamlakat chempioni unvoniga ega chiqqan. Eng oxirgi marta ushbu titul 2019 yilda qo'lga kiritilgan.

Malumot uchun, "Al Nassr"da O'zbekiston terma jamoasi etakchisi Jaloliddin Masharipov ham to'p tepadi.