SHaxmat. Jahon chempionatining 9-turida birgina Rahmon g'alaba qozondi

Unda O'zbekiston o'smir va yoshlar terma jamoasi azolari ham o'z imkoniyatlarini sinovdan o'tkazishyapti. 14 yoshgacha o'smirlar o'rtasidagi bahslarda yurtimiz sport sharafini himoya qilayotgan Nodirbek Yoqubboev 9-tur uchrashuvida qora donalarda harakat qilib, rossiyalik Semen Lomasovga yutqazib qo'ydi.

Yoqubboev ushbu mag'lubiyatdan so'ng 6 ochko bilan qo'shimcha ko'rsatkichlarga ko'ra 9-o'ringa tushib ketdi. Bugun Nodirbek o'zi singari 6 ochkoga ega bo'lib turgan rossiyalik Yaroslav Remizovga qarshi dona suradi.

16 yoshlilar guruhida qatnashayotgan Saydali Saidakbarov 9-turda amerikalik Tiglon Bryusga qarshi qora donalarda o'ynab, durang qayd etdi. Bugun Saydali oq donalarda mezbonlar vakili Timur Trubchaninov bilan munosabatlariga oydinlik kiritib oladi.

16 yoshlilar guruhida ishtirok etayotgan shaxmatchimiz Nilufar Yoqubboeva bu turda mag'lubiyat alamini totib ko'rdi. Oq donalarda o'ynashiga qaramay, u hindistonlik Priyankaga imkoniyatni boy berdi. Besh yarim ochko bilan 11-pog'onadan joy olgan Nilufar bugun mo'g'ulistonlik Amina Battsujga qarshi dona suradi.  

18 yoshgacha bo'lgan shahmatchilar musobaqasida qatnashayotgan Bahora Abdusattorova bu turda mo'g'ulistonlik Uurtsayx Uurinttuyadan engildi. Bugun Bahora rossiyalik Bibisara Assaubaeva bilan munosabatlariga oydinlik kiritib oladi. Har ikki shaxmatchi 5,5tadan ochko jamg'arishgan.

Va nihoyat, 18 yoshli o'g'il bolalar musobaqasida o'z mahoratini namoyish etayotgan Adil Rahmon 9-turda g'alaba qozongan yagona hamyurtimiz bo'ldi. U qora donalarda harakat qilishiga qaramay, vetnamlik Xoang Du Nguendan ustun keldi. Adel 5,5 ochko bilan 10-o'rindan joy olgan.