SHon O’Melli Nurmagomedov - Sendxagen jangining o'tkazilishiga ishonmayapti

Xabaringiz bor, 3 avgust kuni BAA poytaxti Abu-Dabi shahrida UFC on ABC 7 turniri bo'lib o'tadi. Oqshomning markaziy jangi davogarlik maqomida bo'lib, unda amerikalik Kori Sendxagen rossiyalik Umar Nurmagomedovga qarshi oktagonga chiqadi. 

"Umarning janglardan qochish odati borligi hech kimga sir emas. U oz muddat qolganida janglarni bekor qilishni yaxshi ko'radi. Agar shu jang belgilangan muddatida o'tkazilsa, men bundan hayratda qolaman", - dedi chempion SHon. 

Aslida bu jang o'tgan yilning avgust oyida AQSHning Neshvill shahrida o'tkazilgan UFC on ESPN 50 turnirining markaziy bahsi maqomida o'tishi kerak edi. Lekin o'shanda Nurmagomedov mashg'ulotda jarohat orttirib olgani uchun jang bekor qoldirilgandi. Umarning o'rnini egallagan Rob Fontni esa Sendxagen hakamlarning yakdil qarori evaziga mag'lubiyatga uchratgandi. 

Bundan uch oy oldin Umar Nurmagomedov bir yillik tanaffusdan so'ng oktagonga qaytib, UFC promousheni debyutanti, qozog'istonlik Bekzat Almaxanni ochkolar bo'yicha engishga muvaffaq bo'lgandi. SHon O’Melli esa keyingi chempionlik himoya jangini reytingda birinchi o'rinni egallab turgan gruziyalik Merab Dvalishviliga qarshi o'tkazadi. Ushbu jangning 14 sentyabr kuni Las-Vegas shahrida tashkil etiladigan UFC 306 turniri doirasida o'tkazilishi rejalashtirilyapti.