Temirov - Kavana: kuchli zarba va texnik aql to'qnashuvi. Abu-Dabidagi jang nimani hal qiladi? (mutolaa uchun)

Bu jang oddiy reyting to'qnashuvi emas — ikki yuqori tempda harakatlanadigan, faol va chempionlik poygasiga yaqinlashib kelayotgan engil vaznli jangchilarning o'zaro sinovi bo'ladi.

Temirov uchun mazkur bellashuv ayniqsa muhim. Hamyurtimiz Stiv Ercegni birinchi raundda nokaut qilib, UFCdagi rekordini 3–0 ga etkazdi va 20–3 ko'rsatkich bilan reytingning yuqori pog'onalariga ko'tarildi. UFCning amaldagi reytingida u 7-o'rinda turibdi.

Kavana esa reytingda undan bir pog'ona yuqori — 6-o'rinda. Angliyalik sportchi professional faoliyatida 10 ta g'alaba va 2 ta mag'lubiyat qayd etgan. Uning faoliyatidagi eng katta g'alabalaridan biri shu yil fevral oyida sobiq UFC chempioni Brendon Morenoga qarshi jangda qo'lga kiritildi. Ammo Kavana so'nggi jangda Brendon Royvalga mag'lub bo'ldi.

Temirovning asosiy quroli — yuqori bosim

Ramazon Temirovni o'ta engil vazn divizionidagi ko'plab raqiblardan ajratib turadigan jihat — uning jang boshlanganidanoq yuqori tezlikni qo'shishi.

U raqibiga masofa saqlash uchun ko'p vaqt bermaydi. Uning harakatlarida asosiy maqsad — raqibni orqaga chekinishga majbur qilish, qafas yoniga siqish va zarbalar seriyasini uyushtirish.

Stiv Ercegga qarshi jang bunga yaqqol misol bo'ldi. Temirov birinchi raundning o'zida tashabbusni qo'lga oldi, bir nechta aniq zarbalar bilan avstraliyalik jangchini larzaga keltirdi va yakunda o'ng qo'l zarbasi bilan jangni muddatidan oldin tugatdi. Jang 4 daqiqa 21 soniya davom etdi.

Temirovning professional rekordidagi 20 g'alabaning 12 tasi nokaut yoki texnik nokaut orqali qayd etilgan. Yana bir g'alaba sabmishn bilan yakunlangan. Uning 11 ta jangni birinchi raundda tugatgani ham uning qanchalik xavfli start olishini ko'rsatadi.

SHuning uchun Kavana uchun birinchi raundlar eng jiddiy sinov bo'lishi tabiiy.

Kavana nima bilan xavfli?

Lone Kavana — Temirovga qarshi faqat zarba almashish uchun chiqadigan jangchi emas.

Angliyalik sportchining muhim ustunligi — texnik jihatdan turli scenariylarga moslasha olishi. Uning professional rekordida ochkolar bo'yicha g'alabalar salmoqli o'rin tutadi. UFC statistikasiga ko'ra, Kavana jang boshiga o'rtacha 4,13 ta muhim zarba etkazadi, zarbalardan himoya ko'rsatkichi esa 53 foizni tashkil etadi. Uning teykdaun qo'llash bo'yicha o'rtacha ko'rsatkichi 1,12 ta, teykdaundan himoyasi esa 82 foiz.

Eng muhimi, Kavana katta bosim ostida ham o'zini yo'qotib qo'ymasligini Morenoga qarshi jangda ko'rsatdi. U qisqa muddatda asosiy jangga tayyorlanib, ikki karra sobiq chempionni besh raund davomida ochkolar bo'yicha mag'lub etdi.

Demak, Temirov uchun masala faqat kuchli zarba berishda emas. U Kavanaga qarshi jangda sabrli bo'lishi, har bir hujumdan keyin o'zini himoya qilishni unutmasligi va raqibning qarshi hujumiga tushib qolmasligi kerak.

Jangning kaliti — birinchi raund

Bu to'qnashuvda birinchi raund alohida ahamiyat kasb etishi mumkin.

Temirov uchun eng qulay scenariy — jang boshidan tashabbusni olish, Kavananing harakatlanish imkoniyatini cheklash va uning himoyasidagi bo'shliqlarni topish.

Agar Temirov birinchi raunddayoq kuchli zarbalarini o'tkaza boshlasa, Kavana o'zining texnik ustunligidan to'liq foydalana olmasligi mumkin.

Biroq jang ikkinchi va uchinchi raundlarga cho'zilsa, vaziyat o'zgarishi ehtimol. Kavana masofani yaxshi boshqarib, Temirovning bosimini neytrallashtira olsa, jang texnik va taktik kurashga aylanadi.

Bu holatda Temirovning vazifasi — faqat oldinga harakat qilish emas, balki hujumlarini xilma-xillashtirish. Bir xil kombinaciyalarni qayta-qayta takrorlash Kavana kabi texnik jangchi uchun katta qulaylik yaratishi mumkin.

Temirov uchun yana bir muhim sinov

Bu jangning yana bir muhim jihati bor.

Ramazon Ercegni mag'lub etganidan so'ng UFCdagi yuqori o'rinlar uchun jiddiy davogarga aylandi. Uning nomi hatto chempionlik jangini muhokama qilish darajasigacha ko'tarildi. Biroq reytingda yuqoriga chiqish bilan birga raqiblar ham tobora murakkablashadi.

Kavana aynan shunday raqib.

U Temirov uchun kuchli zarbaga ega navbatdagi jangchi emas, balki yuqori darajadagi texnik va taktik sinov. SHu manoda 24 oktyabrdagi jang Temirovning UFCdagi rivojlanishida muhim bosqich bo'ladi.

Agar u Kavana kabi reytingning yuqori qismida turgan raqibni ishonchli tarzda mag'lub etsa, Temirovning chempionlikka davo qilish poziciyasi yanada mustahkamlanadi.

Kimning imkoniyati yuqori?

Qog'ozda jang juda teng ko'rinadi. Reytingda Kavana Temirovdan bir pog'ona yuqori, rekordlar ham ikki sportchining yuqori darajada ekanini ko'rsatadi.

Biroq uslublar nuqtai nazaridan qaraganda, Temirovning eng katta ustunligi — uning nokaut kuchida va jangni erta tugatish qobiliyatida.

Kavana uchun esa asosiy vazifa — birinchi raundlarda Temirovning bosimiga dosh berish va jangni uzaytirish. SHuning uchun ehtimoliy scenariyni ikki qismga ajratish mumkin: jang erta tugasa, Temirovning imkoniyati yuqori; bellashuv uzoq davom etsa, Kavananing texnik va taktik imkoniyatlari ko'proq namoyon bo'lishi mumkin.

Albatta, MMAda bitta zarba butun scenariyni o'zgartirib yuborishi mumkin. Ayniqsa Temirov ishtirokidagi janglarda bu ehtimol yanada yuqori.

Abu-Dabidagi jangning narxi

UFC 333 doirasidagi Temirov — Kavana to'qnashuvi ikki jangchi uchun ham muhim bosqich.

Kavana mag'lubiyatdan keyin o'zini qayta isbotlashi kerak. Ramazon Temirov esa Erceg ustidangi shov-shuvli nokautdan keyin reytingdagi ko'tarilishini tasdiqlashi lozim.

SHu bois bu jangni shartli ravishda «qayta tiklanish» va «yuqoriga ko'tarilish» to'qnashuvi deb atash mumkin.

Temirov g'alaba qozonsa, u nafaqat Kavana bilan hisob-kitob qiladi, balki o'ta engil vazn divizionidagi eng jiddiy chempionlik davogarlaridan biri ekanini yana bir bor isbotlaydi.

24 oktyabr kuni Abu-Dabidagi oktagonda asosiy savol shu bo'ladi: Temirovning portlovchi kuchli starti Kavananing texnikasi va chidamliligini engish uchun etarlimi?

Javob esa jangning birinchi zarbalaridan boshlab aniqlana boshlaydi.