Tokio-2020 Olimpiya va Paralimpiya o'yinlariga mezbonlik qiluvchi “Milliy stadion” rasman ochildi + FOTO

Musobaqa tashkilotchilari Tokio shahrida Olimpiya o'yinlari uchun qurilgan “Milliy stadion”ni rasman ochiq deb elon qilishdi. 

Stadionning ochilish tadbirida Yaponiya Bosh vaziri Sindzo Abe, Tokio Gubernatori Yuriko Koike va arxitektor Kengo Kuma ishtirok etdi. Arenaning Tokio shahri aholisi va mehmonlari uchun o'tkaziladigan ochilish marosimi 21 dekabr kuni tashkil qilinishi, unda afsonaviy sprinter Useyn Boltning ham ishtirok etishi rejalashtirilgan. Olimpiya stadioni o'z bag'riga 68 ming muxlisni sig'dira oladi. 

Stadion Tokio-2020 Olimpiya va Paralimpiya o'yinlarining ochilish, yopilish marosimlari, musobaqa doirasida engil atletika bahslariga mezbonlik qiladi. Eng zamonaviy qulayliklarga ega mazkur arenadagi ilk sport tadbiri 2020 yilning 1 yanvar kuni bo'lib, unda futbol bo'yicha Yaponiya Imperator kubogining final bahsi o'tkaziladi. 

Eslatib o'tamiz, O'zbekiston delegaciyasi 2020 yilning 24 iyul sanasida aynan mazkur stadionda o'tadigan ochilish marosimida yurtimiz bayrog'i ostida chiqib keladi.