Tokio uchun 135 ta licenziya, O'zbekistonda antidoping va boshqa masalalar. Olimpiya o'yinlariga tayyorgarlik yuzasidan matbuot anjumani tashkil etildi

Tokio shahri mezbonik qiladigan Olimpiada o'yinlariga tayyorgarlik ko'rish, ommaviy sport va jismoniy tarbiyani rivojlantirish bo'yicha olib borilayotgan ishlarga bag'ishlangan matbuot anjumanida O'zbekiston Respublikasi Jismoniy tarbiya va sport vazirining birinchi o'rinbosari Oybek Kasimov, MOQ raisi maslahatchisi Nazirjon Xudoyqulov, vazirlik va MOQ mutasaddilari, bir qator sportchilarimiz hamda ommaviy axborot vositalari xodimlari ishtirok etishdi.

Anjuman davomida Tokio Olimpiadasiga tayyorgarlik yo'lida olib borilayotgan ishlar haqida malumot berildi. 

Jumladan Olimpiya o'yinlariga tayyorlanayotgan sportchilarga ko'rsatilayotgan etibor, farmakalogiya, dietologiya yo'nalishlarida amalga oshirilayotgan ishlar haqida gapirildi. 

SHuningdek, Olimpiya sport turlarida yutuqlar qo'lga kiritgan sportchilarning OAVlarga imtiyoz asosida kirishi haqida ham tushuntirishlar berildi. 

Tadbir davomida O'zbekiston Tokiodagi Olimpiya va Paralimpiya o'yinlariga nechta licenziya ko'zlayotgani haqidagi savolga javob berilar ekan, mutasaddilar bu borada kamida 135 ta licenziya rejalashtirilayotgani haqida gapirishdi. Nechta medal maqsad qilingani haqidagi savol esa ochiq qoldirildi. Ammo, imkon qadar Rio Olimpiadasidagi natija yaxshilanishi lozimligi alohida takidlandi. 

Anjumanda shuningdek O'zbekistonda antidoping masalasida olib borilayotgan ishlar, hududlarda ommaviy sportni rivojlantirish kabi masalalarga to'xtalib o'tildi.

Tadbirda boks bo'yicha  jahon chempionlari Bahodir Jalolov, SHahobiddin Zoirov, shuningdek eshkak eshish bo'yicha Osiyo o'yinlari sovrindori, Tokio Olimpiadasi uchun licenziyani naqd qilib qo'ygan Dilnoza Rahmatova  so'zga chiqib, ko'rsatilayotgan etiborga yarasha natija ham ijobiy bo'lishi haqida gapirib o'tishdi. 

Aziz To'xtamurodov tayyorladi

Suratlar muallifi - Alimurod Mamadaminov