Toshkent voleybol bo'yicha o'smirlar o'rtasidagi Osiyo chempionatiga tayyorlanmoqda

Mazkur musobaqaga olib borilayotgan tayyorgarlik ishlari bilan tanishish uchun Osiyo voleybol konfederaciyasi (AVC) musobaqalarni tashkil qilish va nazorat qilish komissiyasi direktori Eom Xo Ju hamda AVC Ijroiya qo'mitasi azosi Ermek Sirlibaev Toshkentga tashrif buyurishdi.

Dastavval mehmonlar O'zbekiston voleybol federaciyasi mutasaddilari bilan oldindagi rejalarni belgilab olishdi. 

Uchrashuvda O'zbekiston voleybol federaciyasi raisining birinchi o'rinbosari Bekmurod Abdullaev, bosh kotib vazifasini bajaruvchi Farhod Alimov va federaciyaning boshqa vakillari qatnashishdi. O'zbekistonlik mutaxassislar davlatimizning qo'llab-quvvatlashi bilan ushbu chempionat yuqori saviyada o'tkazilishi, hozirdanoq barcha kerakli ishlar boshlab yuborilganini malum qilishdi. 

O'z navbatida, mehmonlar ham Toshkentning bu boradagi imkoniyatini yuqori baholashdi.

Bahslar “Yunusobod sport majmuasi” hamda “Universal” sport saroyida o'tishi rejalashtirilgan. AVC vakillari uchrashuvdan so'ng ushbu obektlarni ko'zdan kechirishdi. O'rganish ishlari mobaynida xorijlik mehmonlar terma jamoalar va boshqa rasmiylar uchun ajratilgan mehmonxonalar, mashg'ulot maydonlariga ham tashrif buyurishdi.

Bo'lajak Osiyo chempionatida quyidagi 15 ta davlat ishtirok etadi: O'zbekiston, Qozog'iston, Gonkong, Bahrayn, Hindiston, Tailand, Avstraliya, Saudiya Arabistoni, Eron, Yaponiya, Xitoy, Quvayt, Pokiston, Mo'g'uliston, Xitoy Taipeyi.