Toshkentda voleybol bo'yicha Markaziy Osiyo chempionati boshlandi FOTOREPORTAJ

Osiyo voleybol konfederaciyasi hamda Markaziy Osiyo voleybol associaciyasining 2023 yilgi taqvim rejasiga asosan ikkita yirik musobaqa o'tkazilyapti. Ulardan biri yoshlar o'rtasidagi Markaziy Osiyo chempionati bo'lsa, ikkinchisi 16 yoshgacha bo'lgan o'g'il bolalar ishtirokidagi Osiyo chempionatidir.

Markaziy Osiyo chempionatida 5 ta mamlakat, Osiyo chempionatida esa qitaning 20 davlati terma jamoalari ishtirok etyapti. Kecha yoshlar o'rtasidagi Markaziy Osiyo chempionati bahslariga start berildi. 

SHu kunning o'zida musobaqaning tantanali ochilish marosimi ham bo'lib o'tdi. Unda Osiyo voleybol associaciyasi, yoshlar siyosati va sport vazirligi, mamlakat voleybol federaciyasi mutasaddilari ishtirok etdi.

Bugun qizlar o'rtasida O'zbekiston-1 hamda O'zbekiston-2, Qozog'iston va Tojikiston jamoalari o'rtasida bellashuvlar bo'lib o'tadi. O'g'il bolalar o'rtasidagi bahslar kunning ikkinchi yarmida o'tkazilishi rejaga kiritilgan. Unda Eron - Qozog'iston, O'zbekiston - Pokiston jamoalari o'z mahoratlarini sinovdan o'tkazadilar.

O'g'il va qiz bolalar o'rtasida o'tkazilayotgan Markaziy Osiyo chempionati bahslari 19 iyul sanasida nihoyasiga etadi. 20-30 iyul kunlari esa 16 yoshgacha bo'lgan o'g'il bolalar o'rtasida Osiyo chempionati bahslari bo'lib o'tadi.

Alimurod MAMADAMINOV, o'z muxbirimiz