UFC 303 turnirining yangi markaziy jangi elon qilindi + POSTER

Ushbu to'qnashuv 29 iyun (bizda 30 iyun tongi) kuni AQSHning Nevada shtati Las-Vegas shahrida tashkil etiladigan UFC 303 turnirining markaziy jangi bo'lishi kerak edi. Irlandiyalik mashg'ulotda orttirib olgan jarohati tufayli ushbu jang bekor qilindi. 

Endi yarimog'ir vazn toifasida braziliyalik Aleks Pereyra hamda chexiyalik Irji Proxazka o'rtasida o'tkaziladigan jang markaziy maqomda bo'ladi. SHuningdek, Entoni Smit jarohat olgan Jamal Xillning o'rnini egallaydi va Karlos Ulbergga qarshi oktagonga chiqadi. Yarimengil vazndagi Brayan Ortega - Diego Lopes bahsi esa oqshomning yangi co-main event jangi bo'ladi. Bu malumotlarni shaxsan UFC rahbari Dana Uayt tasdiqladi.

O'tgan yilning noyabr oyida Irji Proxazka yarimog'ir vazn toifasida vakant bo'lib turgan UFC kamarini qo'lga kiritishi mumkin edi. Ammo u Aleks Pereyraga ikkinchi raundda texnik nokautga uchragandi. O'shandan keyin braziliyalik UFC 300 turnirida kamarini ilk bor muvaffaqiyatli himoya qildi. Aleks birinchi raundda sobiq chempioni Jamal Xillni nokautga uchratdi. CHexiyalik Irji esa aynan shu yubiley turnir doirasida Aleksandr Rakichni ikkinchi raundda texnik nokaut bilan taslim etdi. Bu g'alaba unga UFC yarimog'ir vaznlilar reytingida birinchi o'ringa chiqib olishi uchun etarli bo'ldi.

Diego Lopes esa o'tgan yilning may oyida UFC promoushenida debyut qildi. U rossiyalik Movsar Evloevga ochkolar hisobiga ko'ra imkoniyatni boy berib qo'ydi. O'shanda keyin Lopes ketma-ket uchta jangda raqiblarini muddatidan avval mag'lubiyatga uchratdi. Gevin Taker, Pet Sabatini va Sodik Yusuff taslim etildi.

SHu yilning fevral oyida Brayan Ortega bir yillik tanaffusdan so'ngi oktagonga qaytdi. U revansh jangida Yair Rodrigesni muddatidan avval taslim etdi. Bu bilan Ortega ketma-ket ikkita mag'lubiyatli seriyasiga ham barham berdi.