Voleybol. Andijon viloyati jamoasi O'zbekiston kubogi sohibi + FOTOGALEREYA

Mazkur mamlakat kubogi bahslarida Qoraqalpog'iston Respublikasi, Toshkent shahri barcha viloyatlardan 14 ta jamoa chempionlik yo'lida kurash olib bordi. Musobaqaning final bosqichiga Qashqadaryo, Andijon, Sirdaryo va Toshkent viloyati jamoalari etib kelishdi. 

Final chiptasi uchun bo'lgan bellashuvlarda Toshkent viloyati sportchilari Sirdaryo jamoasini mag'lub etib, finalga yo'l olgan bo'lsa, andijonlik voleybolchilar Qashqadaryo jamoasidan ustun kelishdi. Uchinchi o'rin uchun kechgan uchrashuvda Qashqadaryo viloyatining asosan Ko'kdala tumanidan tashkil topgan jamoasi sirdaryolik tengqurlarini 2:0 hisobi bilan ortda qoldirib, uchinchi o'rinni qo'lga kiritishdi.

Finalda o'zaro to'qnash kelgan Andijon va Toshkent viloyati jamoalari o'rtasidagi o'yin shiddatli va keskin qarama-qarshilikka boy bo'ldi. Yakunda andijonlik yosh voleybolchilar 2:1 hisobi bilan zafar quchib, O'zbekiston kubogi sohiblariga aylanishdi. Mezbonlardan iborat jamoa kumush medallarga ega chiqdi. 

Musobaqa yakunlangach, tantanali taqdirlash marosimi tashkil etildi. Unda ishtirok etgan Toshkent viloyati sport boshqarmasi boshlig'i Rustam Boboqulov, O'zbekiston voleybol federaciyasi raisi o'rinbosari Jamshid Fayziev, O'zDJTSU birinchi prorektori SHerzod Mirzanov, Toshkent viloyati voleybol federaciyasi ijrochi direktori Davron Xalikovlar g'olib va sovrindor jamoalarga diplom, medal, kubok va qimmatbaho esdalik sovg'alarini topshirishdi.

Takidlash joiz, g'olib jamoa endi joriy yilda Rossiyaning Novosibirsk shahrida o'tkaziladigan Hamdo'stlik kubogida mamlakatimiz sharafini himoya qiladi.

Ilhom RAHMONOV tayyorladi