Voleybol: ayollar o'rtasida O'zbekiston superkubogi g'olibi aniqlandi

Erkaklar o'rtasidagi bahsda amaldagi O'zbekiston chempioni va kubogi egasi Samarqandning «O'ztelekom» jamoasi chempionatning kumush medali sohibi OTMK jamoasiga qarshi maydonga tushdi. Qizg'in va murosasiz kechgan o'yinda mahorat va tajriba o'z so'zini aytdi. Garchi OTMK jamoasi o'z uyida harakat qilgan bo'lsada, yakunda 2:3 hisobida imkoniyatni boy berdi.

Ayollar o'rtasida esa bugunning o'zidayoq O'zbekiston superkubogi sohibi aniqlandi. Unda kutilmaganda mamlakat chempioni va kubogi sohibi O'zbekiston davlat jismoniy tarbiya va sport universitetining SKUF jamoasi Nukus davlat pedagogika instituti voleybolchi qizlariga imkoniyatni boy berib qo'ydi.

Kecha bo'lib o'tgan dastlabki o'yinda nukuslik voleybolchi qizlar 3:1 hisobi bilan g'alaba qozonishgan bo'lsa, hozirgina yakuniga etgan bahsda ular yanada ishonchli hisobda g'olib chiqishdi: SKUF – NDPI – 0:3. SHu tariqa ayollar o'rtasida O'zbekiston superkubogi Qoraqalpog'iston Respublikasiga yo'l oladigan bo'ldi.

Eslatib o'tamiz, O'zbekiston superkubogida o'yinlar ikki g'alabagacha davom etadi. Agar bugun erkaklar o'rtasidagi ikkinchi o'yinda ham «O'ztelekom» g'alaba qozonsa, u holda bosh sovrin Samarqandga yo'l oladi.