Voleybol bo'yicha birinchi Markaziy Osiyo chempionatida guruh bahslari yakunlandi

Xabaringiz bor, ayni kunlarda Farg'ona shahridagi «Samo» sport majmuasida voleybol bo'yicha erkaklar va ayollar o'rtasida birinchi Markaziy Osiyo chempionati o'tkazilmoqda. Kecha guruh bahslari yakuniga etib, yarim finalchilar aniqlandi.

Etiborli jihati, erkaklar va ayollar o'rtasidagi musobaqalarda yarim final juftliklari bir xil ko'rinish oldi.

Jumladan, erkaklar o'rtasidagi musobaqalarda qo'shni Qozog'iston terma jamoasi barcha o'yinlarni g'alaba bilan yakunlab, guruh bosqichini 1-o'rinda tugatdi. Endi ular final yo'llanmasi uchun guruh bahslarini so'nggi pog'onada tamomlagan tojikistonliklar bilan kuch sinashadi. Ikkinchi yarim final juftligini O'zbekiston va Qirg'iziston terma jamoalari tashkil etishdi.

Xuddi shunday holat ayollar o'rtasida ham kuzatildi. Yani, bu erda ham guruh bosqichini qozog'istonliklar 1-o'rinda tugatishdi. Yarim finalda ular guruh autsayderi Tojikiston bilan kuch sinashsa, hamyurtlarimiz qirg'izistonlik dugonalari bilan musobaqalashadi.

Darvoqe, kecha bo'lib o'tgan O'zbekiston va Qirg'iziston jamoalari uchrashuvlarini tomosha qilish uchun Farg'onaga Qirg'iziston Respublikasi Botken viloyati gubernatori A.Alimbaev tashrif buyurdi. Faxriy mehmonni Farg'ona viloyati hokimi o'rinbosari, Turizm va sport bosh boshqarmasi boshlig'i X.Ahmedov kutib oldi.

Tashrif davomida A.Alimbaev «Samo» sport majmuasida yaratilgan sharoitlarni ham ko'zdan kechirdi.

Musobaqa g'oliblari 22 avgust kuni aniqlanadi.