Voleybol bo'yicha erkaklar terma jamoamiz Osiyo chempionatiga jo'nab ketdi, ular 12 yillik tanaffusdan so'ng qita birinchiligida qatnashishadi

Bugun ertalab voleybol bo'yicha O'zbekiston erkaklar terma jamoasi azolari Yaponiyaning CHiba shahrida o'tkaziladigan Osiyo chempionatida qatnashish uchun jo'nab ketishdi. Vakillarimiz kunchiqar yurtga Turkiya orqali etib borishadi.

Terma jamoamiz tarkibidan 11 nafar sportchi, 2 nafar murabbiy hamda shifokor o'rin olgan. Mamlakatimiz sport delegaciyasiga O'zbekiston voleybol federaciyasi bosh kotibi Xusan Nasrullaev rahbarlik qilmoqda.

Osiyo chempionatida 16ta jamoa 4 guruhga bo'lingan holda bahslarga kirishadi. Vakillarimiz esa «S» guruhida Avstraliya, Xitoy hamda Quvayt terma jamoalari bilan kuch sinashadi. O'z guruhlarida 1-2-o'rinlarni egallagan terma jamoalar pley-off bosqichida medallar uchun kurashni davom ettirishsa, 3-4-o'rinlarni band etgan yurt vakillari 9-16-o'rin egalarini aniqlab olish uchun bahs yuritishadi.

SHuni takidlash kerak, O'zbekiston voleybol terma jamoasi so'nggi marotaba bundan 12 yil muqaddam qita chempionatida ishtirok etgan. Keyinchalik turli sabablarga ko'ra na erkaklar, na ayollar terma jamoalarimiz Osiyo chempionatiga borishmagan. Buning natijasida Osiyo voleybol konfederaciyasi O'zbekiston voleybol federaciyasini qita miqyosidagi har qanday musobaqada ishtirok etishini taqiqlab qo'ygan hamda moliyaviy jarimaga ham tortgandi. Federaciyaning yangi rahbariyati tomonidan olib borilgan say-harakatlar natijasida mana shu muammolar bartaraf etildi va endi bemalol yurtimiz voleybolchilari qita miqyosidagi musobaqalarda, agarda omadi chopsa jahon miqyosidagi musobaqalarda ham ishtirok etishi mumkin.

Voleybol bo'yicha erkaklar o'rtasida Osiyo chempionati 12-19 sentyabr kunlari o'tkaziladi. Bo'lajak musobaqada vakillarimizga omad tilaymiz.

Turizm va sport vazirligi Matbuot xizmati