Voleybol. Ilk bor o'tkazilgan mamlakat chempionatida andijonlik faxriylar tengsiz

Musobaqada 7 ta jamoa g'oliblik uchun bahs olib bordi.

“A” guruhida Andijon viloyati faxriylari barcha o'yinlarda g'alaba qozonib, guruh g'olibi sifatida yarim finalga yo'l olgan bo'lsa, Qoraqalpog'iston Respublikasi faxriylari ikki g'alaba va bir mag'lubiyat bilan ikkinchi bo'lishdi.

“B” guruhida farg'onaliklar yuz foizlik natija bilan 1-o'rinni egallagan bo'lishsa, Namangan viloyati faxriylari buxoroliklarni musobaqadan chiqarib yubordi.

Yarim finalda quyidagi natijalar qayd etildi:

Andijon – Namangan – 2:1

Qoraqalpog'iston Respublikasi – Farg'ona – 2:0.

Finalda tanish raqiblar to'qnash kelishdi. Odatda ikki jamoa bir musobaqa davomida ikki bor ro'baro' kelsa, ko'p hollarda guruh bosqichida g'olib bo'lgan jamoa finalda imkoniyatni boy berib qo'yadi. Ammo, voleybol bo'yicha faxriylar o'rtasida birinchi O'zbekiston chempionatida bunday holat kuzatilmadi. Andijonlik faxriy voleybolchilar ikkinchi to'qnashuvda ham qoraqalpog'istonlik raqiblarini ayab o'tirishmadi: 25:10, 25:11.

SHu tariqa O'zbekiston chempionatining oltin medali Andijon viloyati jamoasiga nasib etgan bo'lsa, kumush medalni qoraqalpog'istonlik faxriylar qo'lga kiritdi. Namangan viloyati jamoasi esa bronza medaliga sazovor bo'ldi.