Voleybol: o'smirlar va qizlar O'zbekiston kubogi uchun musobaqalashmoqda

SHu kunlarda Farg'ona shahrida respublikamizdagi bolalar-o'smirlar sport maktablari va ixtisoslashtirilgan bolalar-o'smirlar sport maktablarining tarbiyalanuvchilari o'rtasida O'zbekiston kubogi o'tkazilmoqda. Musobaqada 2005-2006 yillarda tug'ilgan o'smirlar va qizlar jamoalari g'oliblik uchun bahs olib borishyapti.

Jumladan, o'g'il bolalar o'rtasidagi bahslarda jami 10ta jamoa ikki guruhga bo'lingan holda kurashga kirishdi. “A” guruhidan Farg'ona, Andijon, Sirdaryo, Samarqand hamda Qashqadaryo viloyatlarining yosh voleybolchilari o'rin olishgan bo'lsa, “B” guruhini Qoraqalpog'iston Respublikasi, Namangan, Jizzax, Navoiy va Xorazm viloyati jamoalari to'ldirishdi. Ayrim sabablarga ko'ra musobaqada Toshkent shahri va viloyati, Surxondaryo hamda Buxoro viloyatidan jamoalar ishtirok etishmayapti.

Qizlar o'rtasidagi bahslarda esa atigi 9ta jamoa qatnashmoqda. Bular – Qoraqalpog'iston Respublikasi, Farg'ona, Andijon, Namangan, Toshkent, Sirdaryo, Jizzax, Qashqadaryo hamda Xorazm viloyatlari voleybolchi qizlaridir.

Musobaqaning ochilish marosimida Farg'ona viloyati turizm va sport bosh boshqarmasi boshlig'ining o'rinbosari Nodir Hakimov, O'zbekiston voleybol federaciyasi Bosh kotibi Xusan Nasrullaev va boshqalar so'zga chiqib, yosh voleybolchilarga bo'lajak musobaqada omad tilashdi.

Voleybol bo'yicha BO'SM va IBO'SMlarning tarbiyalanuvchilari o'rtasida O'zbekiston kubogi g'oliblari 3 dekabrda malum bo'ladi.