Xokkey. O'smirlar o'rtasidagi O'zbekiston Ochiq CHempionati start olmoqda

Musobaqa U10, U12 va U14 yosh toifalaridagi o'smir jamoalari o'rtasida o'tkaziladi. 

O'yinlar mamlakatning bosh muz saroyi — Humo Arenada, shuningdek, Samarqand shahridagi "Family Park" muz maydonida bo'lib o'tadi.

2025–2026-yilgi mavsumda quyidagi jamoalar muzga tushadi: Humo Wings (Toshkent), Humo Sky (Toshkent), "Snezjiy Bars" (Toshkent), "SHerdor" (Samarqand), "Tornado" (CHimkent), SDYUSSH BINOKOR (Toshkent), Hockey Planet (Toshkent), Rakhimjan (Olmaota), Alma-Ata (Olmaota).

O'tgan mavsumda O'zbekiston Respublikasi Ochiq CHempionati uch yosh toifasida — U9, U12 va U15 bo'lib o'tgan edi. U9 kichik guruhida oltin medallarni Humo-1 (Toshkent) jamoasi qo'lga kiritgan. U12 toifasida chempionlik unvoniga Humo Akademiyasi (Toshkent) sazovor bo'lgan. U15 katta yosh guruhida esa g'oliblikni Turan (CHimkent) jamoasi qo'lga kiritgan.

CHempionat yosh xokkeychilarning sport mahoratini rivojlantirishga xizmat qiladi. Bunday musobaqalar kelajak avlodi shakllanishi uchun poydevor bo'lib, ular yurtimiz sharafini xalqaro maydonlarda himoya qiladigan sportchilarga aylanishiga yordam beradi.

Musobaqa ochilishi 26 sentyabr kuni bo'lib o'tadi. U14 toifasidagi ilk uchrashuvda kichik Humo Arena muzida “Humo Sky” (Toshkent) va “Alma-Ata” (Almata) jamoalari o'zaro bahs olib boradi. Uchrashuv soat 14:40 da boshlanadi. OAV vakillari, muxlislar va barcha xokkey ishqibozlarini yosh sportchilarni qo'llab-quvvatlashga va yangi xokkey mavsumining startiga guvoh bo'lishga taklif qilamiz!