17 ёшли Камила Заморано WBC чемпионига айланди

Қизиғи, Заморано чемпионлик жангида рингга чиқмай туриб ҳам WBC камарини қўлга киритди. Камила шу кунгача биринчи енгил вазн (46,26 кг гача) тоифасида вақтинчалик WBC чемпиони эди. Ушбу вазнда мутлақ жаҳон чемпиони Тина Руппрехт 33 ёшида фаолиятини якунлаганини эълон қилганидан сўнг Заморана автоматик равишда тўлақонли WBC чемпионига айланди. 

Маълумот учун, Камила Мексикада профессионал бокс лицензиясини олиш учун рухсат этилган минимал ёш - 15 ёшга тўлганидан кўп ўтмай профессионал боксда дебют қилганди. Икки ярим йил ичида у 12 та жанг ўтказиб, барчасида ғалаба қозонди (биттасида муддатидан олдин).

Эслатиб ўтамиз, бокс бўйича тарихдаги энг ёш жаҳон чемпиони пуэрто-риколик Вильфред Бенитес ҳисобланади. У 1976 йил 6 март куни 30 ёшли Антонио Сервантесни ҳакамлар қарорига кўра очколар ҳисобида мағлуб этиб, ундан биринчи ярим ўрта вазн тоифасида WBA чемпионлик камарини тортиб олганида 17 ёш 5 ойу 24 кунлик эди.

Камила Заморано эса чемпионлик камари топширилган пайтда 17 ёшу 9 ой 20 кунлик эди. Агар мексикалик 4 ой олдин бу натижага эришганида, эркаклар ўртасидаги рекордни ҳам янгиларди.