19 ёшли Коко Гауфф US Open финалида!

Турнирнинг аёллар ўртасидаги баҳсларида илк финалчининг номи маълум бўлди. Жаҳоннинг олтинчи ракеткаси Коко Гауфф ярим финалда WTA рейтингида 10-ўринни эгаллаб турган чехиялик Каролина Муховадан 6:4, 7:5 ҳисобида устун келди.

Шу тариқа, 19 ёшли америкалик теннисчи фаолиятида иккинчи бор "Катта Дубулға" туркумига кирувчи турнир финалига чиқди. Ўтган йили у "Ролан Гаррос"даги ҳал қилувчи баҳсда мағлуб бўлганди.

Умуман олганда, WТА даражасидаги турнирларда Гауфф еттинчи бор финалга чиқди ва олтинчи чемпионлик учун курашади.

"Уимблдон-2023"дан кейин америкалик спортчи 18 учрашувнинг 17 тасида ғалаба қозонди. Айни вақтда у кетма-кет 11 ўйиндан иборат ғалабали серияга эга. АҚШ Очиқ чемпионатидан олдин у Цинциннатида чемпионликни қўлга киритганди.

Гауфф уйида ўтаётган турнирнинг бош совринини қўлга киритиш учун Арйна Соболенко ёки Медисон Кизга қарши кортга чиқади.