23 ёшли Янник Синнер - US Open чемпиони!

Эркаклар ўртасидаги яккалик мусобақаси бош соврини италиялик 23 ёшли Янник Синнерга насиб этди. Дунёнинг биринчи ракеткаси ҳал қилувчи финал учрашувида ATP рейтингида 12-ўринни эгаллаб турган америкалик Тэйлор Фритцга қарши кортга чиқди ва уч сет натижасига кўра ғалаба қозонди - 6/3, 6/4, 7/5.

Янник теннисчиларнинг ўзаро учрашувлари ҳисобида ҳам олдинга чиқиб олди - 2:1. Икки соату 15 дақиқа давом этган баҳсда Cиннер 6, Фритц 10 та эйс зарбасини амалга оширган. Қўшхатолар италияликда кўпроқ бўлди - 5 га 4. Брейклар бўйича устунлик ҳам табиийки, ғолиб теннисчи томонида бўлди - 6 га 2. 

Бу Синнер учун кетма-кет 11-ғалаба бўлди. АҚШ Очиқ чемпионати олдидан у Цинциннати "Мастерс" турнирида ҳам чемпион бўлган эди. У фаолиятидаги иккинчи "Катта Дубулға" турнири чемпионлигини қўлга киритди. Янник йил бошида Australian Open мусобақасида ҳам бош соврин соҳибига айланганди. 

Нью-Йорк шаҳридаги муваффақиятли иштирок Янник Синнерга 2000 рейтинг очкоси ҳамда 3 миллион 600 минг АҚШ доллари миқдорида мукофот пули келтирди.