4 йилдан сўнг Даниил Медведев Хитойга қайтмоқда

US Open 2021 чемпиони ва айни дамда жаҳоннинг учунчи рақмли теннисчиси Данил Медведев 28 сентябрдан 4 октябрга қадар давом этадиган ATP-500 тоифасидаги турнирда қатнашиш учун Пекинга учиб кетди. 

Сўнгги US Open 2023 мусобақасида Медведев 2022 йилги чемпион Карлос Алькарасни мағлуб этиб, финалга чиққан ва ҳал қилувчи баҳсда 23 карра чемпион Новак Жоковичга имкониятни бой бериб қўйганди. Ўшанда россиялик ракетка устаси 3:6, 6:7 (5:7), 3:6 ҳисобида мағлуб бўлган. 

Хитой пойтахтида бўлиб ўтувчи турнирнинг мукофот жамғармаси 3 633 875 долларни ташкил этади. Мусобақа 2019 йилдан бери аввалига коронавирус пандемияси, кейин эса Пен Шуай (хитойлик аёл теннисчи) билан жанжал туфайли ўтказилмаган. 2019 йилда австриялик Доминик Тим Пекинда чемпионликни ўзиники қилган эди.