Жаҳон чемпионати шу йилнинг ўзидаёқ ўтказилади

UWW қабул қилган қарорга кўра, катталар ўртасидаги жаҳон чемпионати 2020 йилнинг 12-20 декабрь кунлари Сербия пойтахти Белград шаҳрида бўлиб ўтади. Бу мусобақадан аввалроқ, аниқроғи 4-10 декабрь кунлари оралиғида айнан Белград ўсмирлар ўртасидаги жаҳон чемпионатини ҳам қабул қилади. 

Ижроия қўмита иккита мусобақанинг бир шаҳарда ўтказилиши коронавирус билан касалланиш эҳтимолини камайтиради, деган фикрни илгари сурмоқда. Шу сабабдан ҳам ўсмирлар ва катталар ўртасидаги жаҳон чемпионатлари Сербия пойтахтида ўтказилиши таъминланди. 

2020 йилнинг қолган қисми учун тақвим:

Кадетлар ўртасидаги Европа чемпионати - 5-11 октябрь, Польша

Ўсмирлар ўртасидаги Европа чемпионати - 19-25 октябрь, Скопье (Македония)

23 ёшгача курашчилар ўртасидаги жаҳон чемпионати - 23-29 ноябрь, Тампере (Финляндия).

UWW Ижроия қўмитаси халқаро мавсум рестарти учун режаларни ишлаб чиқди ва тасдиқлади. Унда асосий эътибор спортчилар ва бошқа иштирокчиларнинг соғлиғи ҳамда хавфсизлигини таъминлаш, COVID-19 бўйича барча чора-тадбирларга амал қилиш масалаларига қаратилган. Мусобақага яқин мезбон давлатдаги коронавирус билан боғлиқ ҳолатга қараб қабул қилинган мезонларга ўзгартириш киритилиши мумкин.  

Шунингдек, ўтказиладиган барча турнирлар UWW қабул қилган қоидаларга мос келиши ҳамда мусобақа стартидан икки ой олдин тасдиқланиши шарт. Жаҳон ва қитъа чемпионатларида 10 тадан камида 8 та кучли жамоаларнинг иштироки таъминланиши ҳамда ўтган йилги умумий қатнашчилар сони 70 фоиздан кам бўлмаслиги шарт.