"8 соатлик парвоз, аэропортдаги кутиш, ҳужжатлар ва ажойиб суратлар". Токиодан махсус мухбиримиз хабар беради (ФОТО)

Кутиб олиш унчалик тантановор бўлмади. Гарчи самолёт аллақачон кўрсатилган манзилга келган бўлсада, ярим соатлардан сўнг, эшикка чиқиш рухсат этилди. Махсус тайинланган вакиллар делегация аъзоларини назорат пунктларига бошлаб боришди. Боши кўринмайдиган узун коридор четидан жой олдик. Масофани сақлаган ҳолда, навбатимизни кута бошладик. Назоратдан ўтиш учун навбат кутаётганлар кўп эди. Рейслар эса бирин-кетин келиб қўняпти. Кутишдан бошқа чора йўқ. Ҳамма кўрсатмаларни бажариши шарт эди. Бу орада бирин-кетин ҳужжатларни кўздан кечириш бошланди.

Тўғрисини айтганда, ҳужжатларимизда камчиликлар бисёр эди. Сафар олдидан гуруҳ аъзолари OCHA деб номланган ҳужжатни пунктма пункт тўлдириши шарт бўлган. Аммо бу енгил иш эмас экан. Спорт журналистлари (10 нафар)   дан биронтаси ҳам электрон шаклдаги бу кўрсатмаларни тўлиқ бажара олмади. Бу дастурнинг ўзида чалкашликлар чиқиб қолди. Хуллас, бу OCHA дегани аэропортда ҳам додимизни берди. Роса қийналдик. Айниқса, тил билмаганлар азобини тортди.

Бу билан иш тугамади. Пандемия туфайли бир неча назорат пунктларидан ўтишимиз, ҳужжатларни расмийлаштириш зарур эди.

Чалкашликлар, талашиб-тортишишлар, кутиш роса чўзилди. Нарита аэопортида 10 соатга михландик. Олимпия ўйинларини ёритиш истагида Токиога ташриф буюрган журналистлар учун меҳмонхона аэропортдан 70-80 километр узоқликда экан. 2 соат деганда мўлжалдаги маконга етиб келдик.

Гарчи қоронғи тушиб қолган бўлсада, атрофнинг тоза ва озодалигини ҳис қилиш қийин эмас. Атроф кўм-кўк. Баҳри дилинг очилади.

"Grand fresa" меҳмонхонасига жойлашдик. Бу меҳмонхонада асосан журналистлар жойлашган экан. Бу ердан матбуот марказига ҳам яқин дейишди.  

Бир-икки кун меҳмонхонада карантин нормаларини бажариш кераклиги айтилмоқда.