Абдулло Алиев ва Жалгасбай Бердимуратов Будапешт рейтинг турнири совриндори!

Ушбу нуфузли мусобақада фақат юнон-рум кураши бўйича терма жамоамиз аъзолари иштирок этишди.

Якунда 72 кг вазн тоифасидаги ҳамюртимиз Абдулло Алиев мусобақада кумуш, 82 кг вазнли Жалгасбай Бердимуратов эса бронза медалига эга чиқди.

U-20 ва U-23 ёш тоифаларида Осиё чемпиони, катталар ўртасидаги қитъа биринчилигининг вице-чемпиони ҳисобланган Алиев турнирнинг ҳал қилувчи баҳсида Грузия вакили, Европа чемпионати совриндори Юри Ломадзе билан тўқнаш келиб, 2:8 ҳисобида имкониятни бой берди.

Жалгасбай Бердимуратов эса учинчи ўрин учун кечган беллашувда россиялик Рафаэль Юнусовни 2:1 ҳисобида таслим этди.

Шу тариқа, юнон-рум курашчиларимиз Будапешт рейтинг турнирини 2 та медаль билан (1 та кумуш ва 1 та бронза) якунлашди.