Абдураимова дунёнинг собиқ иккинчи ракеткасига қарши уч сетлик учрашув ўтказди

Мукофот жамғармаси 780,637 долларни ташкил этувчи ушбу турнирнинг саралаш баҳсларида ҳамюртимиз Нигина Абдураимова ҳам ўз омадини синаб кўрди. Мамлакатимизнинг биринчи ракеткаси қуръа натижасига кўра саралашнинг илк даврасида Вера Звонарёвага қарши кортга чиқди. 

Бир соату 36 дақиқа давом этган баҳсда саралашнинг 11-ракеткаси сифатида сараланган Абдураимова номдор рақибасига 2/6, 6/1, 2/6 ҳисобларида имкониятни бой бериб қўйди. Вера 1, Нигина 2 та эйс зарбасини амалга оширган. Теннисчиларнинг ўзаро иккинчи учрашувида ҳам Звонарёванинг қўли баланд келди. 

Маълумот учун, россиялик 38 ёшли теннисчи ўз вақтида дунёнинг иккинчи ракеткаси бўлган. Олимпия ўйинларининг бронза медали совриндори, "Катта Дубулға" турнирларининг 5 карра (3 та жуфтликда, 2 та аралаш жуфтликда) ғолибаси, 24 та (12 таси яккаликда) WTA турнирлари чемпиони ҳисобланган Звонарёва айни пайтда дунё рейтингида 1232-поғонадан жой олган. Абдураимова эса дунёнинг 169-ракеткаси бўлиб турибди.