Adelaide International турнирида финалчилар маълум

Дунёнинг еттинчи ракеткаси Жессика Пегула мусобақанинг бош соврини учун кортга чиқадиган бўлди. Америкалик теннис маликаси Adelaide International 1/2 финалида WTA рейтингининг 25-поғонасида бораётган қозоғистонлик Юлия Путинцевани мағлубиятга учратди - 7/6(4), 6/3.

Жессика теннисчиларнинг ўзаро учрашувларида мутлақ устунлик билан олдинда бормоқда - 3:0. Тўқсон дақиқа давом этган баҳсда Пегула 4, Путинцева 1 та эйс зарбасини амалга оширган. Иккала теннисчи ҳам бир хилда - 4 тадан қўшхатога йўл қўйишди. Бугун Пегула мусобақа бош соврини учун ватандоши Мэдисон Кизга қарши кортга чиқади.