“Адолат” СДП билан ҳамкорликда мусобақа ўтказилди

Федерация ва партия ўзаро аҳоли ўртасида соғлом турмуш тарзини тарғиб қилиш ва миллий спорт турларига бўлган эътиборни ошириш мақсадида меморандум имзолаган эди. 

Ушбу келишув доирасида айни пайтда жойларда Ўзбекистон “Адолат” СДП томонидан миллий белбоғли кураш бўйича “Адолат кубоги” мусобақасининг туман, шаҳар ва вилоят босқичлари ўтказилмоқда. 

Хусусан, Чирчиқ ихтисослаштирилган олимпия захиралари мактаб-интернатида Ўзбекистон “Адолат” СДПнинг Чирчиқ шаҳар кенгаши ҳамда Чирчиқ шаҳар жисмоний тарбия ва спорт бўлими ҳамкорлигида 2000-2002 йилларда туғилган ўсмирлар ўртасида белбоғли кураш бўйича олтита вазн тоифасида шаҳар босқич баҳслари бўлиб ўтди.     

Қизғин ва муросасиз ўтган беллашувда Мансур Содиқов (55 кг.), Шавкат Сулаймонхўжаев (60 кг.), Шаҳзод Улуғбеков (66 кг.), Мангуберди Имянов (71 кг.), Жаҳонгир Воҳидов (77 кг.), Абдулатиф Каримов (83 кг.)лар ўз вазн тоифаларида биринчи ўринни қўлга киритиб, вилоят босқичига йўлланма олишди. 

Тақдирлаш маросимида ғолиб ва совриндорлар диплом ҳамда Ўзбекистон “Адолат” СДП Чирчиқ шаҳар Кенгаши раиси Равшан Дастиров томонидан эсдалик совғалари билан мукофотланишди.

Маълумот учун, “Адолат кубоги” номли мусобақанинг Республика финал  босқичи 17 май куни Тошкент шаҳрида бўлиб ўтади. 

Илҳом РАҲМОНОВ тайёрлади