Александр Усик фаолиятидаги кейинги учта жангини анонс қилди

23 май куни у машҳур кикбоксчи, у даражада бокс тажрибасига эга бўлмаган Рико Верхувенга қарши рингга кўтарилади. Усик учун бу жанг жуда ҳам қизиқ.

Верхувендан кейин эса 39 ёшли украиналик 9 май куни бўлиб ўтадиган WBO камари учун Фабио Уордли ва Даниэль Дюбуа ўртасидаги жанг ғолибига қарши жанг ўтказмоқчи.

"Мен учун бу ҳақиқий жанг, - деди Усик Inside The Ring дастурига Верховен билан жанг ҳақида берган интервьюсида. - Ҳа, Рико яхши боксчи эмас, лекин бу қизиқарли жанг-ку? Ҳеч қандай муаммо йўқ. Аммо кейин Даниэль Дюбуа ва Фабио Уордли ўртасидаги жанг ғолиби билан тўқнаш келмоқчиман".

Усикнинг режасидаги учинчи жанг эса собиқ жаҳон чемпиони Тайсон Фьюрига қарши бўлиб ўтади. Британиялик собиқ жаҳон чемпиони катта боксга қайтмоқда ва германиялик Арсланбек Маҳмудовга қарши рингга кўтарилади.

"Яна учта жанг ўтказаман. Биринчиси - Рико, иккинчиси - Уордли ва Дюбуа ўртасидаги жанг ғолиби, учинчиси - дўстим очкўз, семиз Тайсон Фьюрига қарши!", - дея қўшимча қилди Усик.

Дюбуа Уордли устидан ғалаба қозонган тақдирда, Усик икки боксчи - Дюбуа ва Фьюрига қарши жанг ўтказади. Бундан ташқари, Усикдан Агит Кабайелга қарши мажбурий ҳимояни кутаётган WBC бу режаларга қандай муносабатда бўлиши, WBA ва IBF қандайдир чоралар кўриши номаълум.

Шунингдек, Усик ўзи билан тўқнаш келишни режалаштирмаётган бир боксчини ҳам маълум қилди. Бу 21 ёшли британиялик Мозес Итаума бўлиб, у ўтган йилдан бери украиналикнинг потенциал рақибларидан бири сифатида тилга олинмоқда.

"Йўқ, Итаума билан жанг қилмоқчи эмасман, чунки у ёш йигит. Мен бу йигитни синдиришни истамайман", - деди Усик.