Алишер Алимов ЖЧга тайёргарлик кўраётган самбочилар билан учрашди

Айни пайтда Ўзбекистон терма жамоаси мазкур нуфузли мусобақага сўнгги тайёргарликни бошлаб юборган. Самбочиларимизнинг йиғини Чирчиқ шаҳрида бўлиб ўтмоқда. 

Кеча Ўзбекистон самбо ассоциацияси раиси йиғинда иштирок этаётган самбочиларимиз билан учрашиш учун Чирчиқ шаҳрига борди. Ассоциация раҳбари у ерда спортчиларимиз билан учрашиб, терма жамоа аъзоларининг кайфияти билан қизиқди. Йиғин давомида юзага келаётган камчилик ва муаммоларни ўрганди. 

"Ушбу йиғин жаҳон чемпионати олдидан муҳим аҳамиятга эга. Яхши биласиз, Ўзбекистон самбода жаҳон миқёсида ўз обрўсига эга. Ўтган йили Тошкентда ўтказилган жаҳон чемпионатида биз умумжамоа ҳисобида иккинчи ўринни олгандик. Бу сафар ҳам камида ушбу натижани такрорлашни мақсад қилганмиз. Шу сабабли ҳам масъулиятни ҳис қилган ҳолда жаҳон биринчилигига муносиб тайёргарлик кўришимиз лозим. Бу борада самбочиларимизга омад ва муваффақиятлар тилайман", - деди Алишер Алимов мазкур йиғин ҳақида.