“Алпомиш”да алплар кураши бошланди ФОТОГАЛЕРЕЯ

Турнир регламентига мувофиқ,  барча меҳмонлар эрта тонгдан кунни дастлаб буюк аллома Ал Ҳаким ат Термизий қабрини зиёрат қилишдан бошлади. Зиёрат давомида меҳмонларга дастурхон ёзилиб, эҳсон оши тортилди. Зиёрат боғи ҳудудида кураш бўйича маҳорат дарслари ҳам уюштирилди.

Эътиборлиси, ушбу маҳорат дарсларини хорижлик полвонлар бошлаб беришди. Фахрий полвонлар иштирокидаги кўргазмали чиқишлар ҳам  курашнинг жозибасини яққол намойиш этишди.

Таъкидлаш жоиз, Ал Ҳаким ат-Термизий ислом оламининг буюк Термизий тахаллуси билан донг таратган. Ҳаким номи билан машҳур бўлган ушбу алломанинг тўлиқ исми Абу Абдуллоҳ Муҳаммад ибн Али Ибн Ҳасан, ибн Башир Ҳаким Термизий бўлган.

Куннинг иккинчи ярмида Термиздаги имом Термизий халқаро илмий тадқиқот марказида ОАВ вакиллари учун матбуот анжумани ташкил этилди.

Анжуманда Сурхондарё вилоят ҳокими Тўра Боболов, Бош вазир ўринбосари, Ўзбекистон туризм ва спорт вазири Азиз Абдуҳакимов, Халқаро кураш ассоциацияси президенти Ҳайдар Фармон иштирок этди.

Матбуот анжуманида журналист ва блогерлар курашнинг халқаро миқёсдаги ривожи ва бошқа кўплаб саволларига жавоб олишди. Анжуман давомида курашга оид турли таклифлар ҳам ўртага ташланди.

Шундан сўнг барча иштирокчилар “Алпомиш” стадиони томон йўл олишди. Соат 16:00 дан бошлаб халқаро турнирга старт берилди. Эркаклар 81, 90 кг. вазнларда куч синашишаётган бўлишса,  аёллар 48, 57. 63, 70 кг. вазн тоифаларига кўра беллашишмоқда.  

Алимурод Мамадаминов, Илҳом Раҳмонов Термиз шаҳридан