Америкада Усэйн Болтнинг бронзадан ясалган ҳайкали очилди + ФОТО

Бу 8 карра Олимпия ўйинлари чемпиони ҳамда 100 ва 200 метр масофага югуриш бўйича жаҳон рекордчисининг АҚШдаги илк ҳайкали ҳисобланади. У Мирамар шаҳридаги спорт марказида қад ростлади. 

Мирамар - ямайкаликларнинг ривожланишидаги энг йирик марказлардан бири ҳисобланади. Ушбу ҳайкални ямайкалик ҳайкалтарош Бэзил Баррингтон Уотсон ясади. Очилиш маросимида Болтнинг ўзи ҳам иштирок этди.

"Барча даврларнинг энг буюк спринтери Усэйн Болтнинг ҳайкали айнан бизнинг Мирамарда очилганидан ва бу жойга раҳбарлик қилаётганимдан жуда хурсандман. Жаҳон ундан тезроқ бўлган спринтерни кўрмади. "Ансин" спорт мажмуасида "Санъатни жамоат жойларида намоён қилайлик" ташаббуси остида Болтнинг илк ҳайкалини ўрнатиш биз учун шараф бўлди.

Бу орқали биз ушбу спорт турини энди бошлаётган спортчиларга "Балки, барчаси чексиздир" деган фикрни эслатиб ўтмоқчимиз. Буни Болтнинг ўзи ҳам кўп такрорлайди", - деди шаҳар вице-мэри Александра Дэвис.

Айтганча, бу Болтнинг иккинчи ҳайкали ҳисобланади. Унинг илк ҳайкали 2017 йили Ямайкада очилганди.