Андижонда юнон-рум кураши бўйича халқаро турнир ўтказилди ФОТОГАЛЕРЕЯ

Андижон Олимпия ва паралимпия спорт турларига тайёрлаш марказининг ёпиқ аренасида ташкил этилган мазкур мусобақада ўзбекистонлик курашчи полвонлардан ташқари Қирғизистон, Қозоғистон, Тожикистон ва Россия давлатидан келган спортчилар гиламга чиқишди. 

Мусобақанинг очилиш маросимида Андижон вилояти ёшлар сиёсати ва спортни ривожлантириш бош бошқармаси бошлиғи Ўткирбек Тошпўлатов сўзга чиқиб, Акмалхўжа Раҳимовни хотирлади ва унинг оила аъзоларига спортни ривожлантириш йўлида қўшаётган хиссаси учун миннатдорчилик билдирган холда иштирокчиларга омад тилади.

Шундан сўнг катта монитор орқали мусобақа иштирокчиларига Акмалхўжа Раҳимовнинг хотирасига бағишланган видео ролик тақдим этилиб, унинг спортдаги фаолияти ҳақида қисқача маълумот берилди. 

Спорт устаси, миллий тоифадаги ҳакам Акмалхўжа Раҳимов 1965 йил Андижон шахрида туғилган. Ёшлигида бошқа тенгқурларидан фарқли равишда Акмалхўжа спортнинг юнон-рум кураш турига қизиққан ва 10 ёшидан ушбу яккакураш тури билан шуғуллана бошлаган. 

Курашчи сифатида собиқ иттифоқ даврида 1983 йил ёшлар ўртасида спартакиада ғолиби, шунингдек бир неча карра Ўзбекистон чемпионати ғолиби сифатида ҳам эътироф этилган. Россиянинг Омск шаҳридаги олийгоҳда тахсил олиб юрган даврида ҳам спорт билан ҳамнафас бўлиб, бир нечта чемпионатларда совринли ўринларни қўлга киритган.

1991 йил спортчилик фаолиятини якунлаб, маълум муддат соғлигини тиклаш билан банд бўлган. 1996 йилдан 2002 йилга қадар мураббий сифатида иш олиб борган. Ўтган давр мобайнида  давомида 100 дан ортиқ шогирдларини етиштириб чиқарган. 

Мадаминов Муҳаммадумар, Хошимбеков Нурбек, Абдусаломов Ҳайитбой, Мамасолиев Аброр каби кўплаб курашчи спортчилар айнан мураббий Акмалхўжа Раҳимов қўли остида Осиё ва жаҳон чемпионатларида иштирок этиб, шоҳсупага кўтарилган. 

Очилиш маросими якунига етгач, ташкилотчилар меҳмонларни бир пиёла чойга таклиф қилишди. Ғолиб ва совриндорларга ҳомийлар томонидан смарт телевизор, чангютгич, махсус медаль, статуетка ва дипломлар топширилди.