Антидопинг агентлиги: Париж-2024 Олимпиадасига тайёргарлик кўраётган спортчиларга тушунчалар берилди

Ўзбекистон Республикаси Президентининг “Маъмурий ислоҳотлар доирасида Ўзбекистон Республикаси Миллий антидопинг агентлиги фаолиятини самарали ташкил қилиш чора-тадбирлари тўғрисида”ги қарори қабул қилинган бўлиб, мазкур қарорда спортда допинг қўлланишининг олдини олиш ва допингга қарши курашиш бўйича услубий тавсиялар ишлаб чиқиш, жисмоний тарбия-спорт ташкилотлари ва бошқа тузилмаларнинг антидопинг назорати соҳасида қўшма тадбирлар ташкил этиш ва тажриба алмашиш орқали ўзаро ҳамкорлигини таъминлаш белгиланган.

Шунингдек, қарорда Миллий антидопинг агентлиги фаолиятининг устувор йўналишлари сифатида спорт федерациялари, клублари ва жамоалари тиббиёт ходимларининг малакасини оширишга кўмаклашиш, уларга спортда допинг қўлланишининг олдини олиш ва антидопинг назоратини амалга ошириш борасида услубий ёрдам кўрсатиш, таълим дастурларини реализация қилиш, соғлом ва ҳалол спортни тарғиб қилиш мақсад қилиб қўйилган.

Мазкур топшириқлар ижросини таъминлаш мақсадида тўрт йилликнинг энг нуфузли спорт мусобақаси Олимпия ва Паралимпия ўйинларига лицензия берувчи мусобақаларга тайёргарлик кўраётган спортчиларга антидопинг соҳасида кўникмалар бериб келинмоқда.

Куни кеча Агентлик томонидан Тошкент шаҳрида ўқув-машғулот йиғинини олиб бораётган таэквондо WT бўйича терма жамоа аъзоларига “АДEЛ платформасидан фойдаланиш ва терапевтик истиснони қўллаш” мавзусида ўқув-семинар ўтказилди. Семинар давомида спортчилар ўзларини қизиқтирган саволлар билан мутахассисларга юзланишди ва керакли тавсияларни олишди.