Миллий антидопинг агентлиги Мулложонов билан боғлиқ хабарларга муносабат билдирди

Ўзбекистон Миллий Антидопинг агентлиги вазиятга қуйидагича муносабат билдирди:

"Бокс бўйича терма жамоа аъзоси Лазизбек Мулложоновдан жорий йил 11 июндаги олинган допинг синамада Бутунжаҳон антидопинг агентлиги (WADA)нинг “Спортда тақиқланган моддалар ва усуллар рўйхати”да S1.1 анаболик агентлар гуруҳига киритилган “Метастерон” (Methasterone) тақиқланган моддаси аниқланган.

Ушбу ҳолат юзасидан Халқаро тестлаш агентлиги (ITA) томонидан ўрганиш ишлари олиб борилди ва спортчи 3 йил муддатга дисквалификация қилинди. 

Шуни алоҳида таъкидлаб ўтиш жоизки, мазкур қоидабузарлик Л.Мулложоновнинг ундан допинг синама олинган кун, яъни жорий йилнинг 11 июн кунига қадар кўрсатган натижалари, жумладан, Париж-2024 Олимпия ўйинларидаги олтин медалига таъсир ўтказмайди".