Шахматчиларимиз Осиё Миллатлар кубогини ғалаба билан бошлашди. Бугун Ҳиндистонга қарши ўйнаймиз!

Ўзбекистон терма жамоаси мусобақада эркаклар ўртасида тўрт, аёллар ўртасида беш шахматчи билан қатнашяпти. Жамоавий мусобақа швейцарча тизимда, тўққиз турдан иборат бўлади. Ҳар бир шахматчига партия учун 90 дақиқа берилади, ҳар бир юришдан кейин эса соатига 30 сония қўшилади.

Ўзбекистон эркаклар терма жамоаси Осиё Миллатлар кубогининг биринчи турида фаластинлик шахматчиларга қарши баҳс олиб бориб, ишончли 4:0 ҳисобида ғалаба қозонди. Муҳаммадали Абдураҳмонов, Баҳром Бахриллаев, Абдумажид Ботиралиев ва Шерали Равшанов рақибларидан устун келган ҳолда жамоамизга ишончли ҳисобдаги ғалабани тақдим этишди. 

Бугун шахматчиларимиз 2-турда юлдузли таркибга эга Ҳиндистон терма жамоасига қарши дона суришади. Ҳинд гроссмейстерлари 1-турда Ливан терма жамоасини 4:0 ҳисобида доғда қолдиришди. Биринчи турда Россия Непални, Хитой Янги Зеландияни, БАА 3 жамоаси БАА 1 шахматчиларини, Уммон Малайзияни, Сурия эса Гонконгни 4:0 ҳисобида енгди. 

ҲИНДИСТОН — ЎЗБЕКИСТОН (Жуфтликлар)

Ниҳал Сарин (GM 2720) — Ҳумоюн Бегмуратов (GM 2517)

Пранав (GM 2679) — Баҳром Бахриллаев (IM 2400)

Пранеш (GM 2673) — Абдумажид Ботиралиев (FM 2368)

Аравиндҳ Читамбарам (GM 22673) — Шерали Равшанов (FM 2365)

Ўзбекистон аёллар терма жамоаси ҳам Осиё Миллатлар лигаси мусобақасини ишончли ғалаба билан бошлади. Қизларимиз Покистон терма жамоасидан 4:0 ҳисобида устун келишди. Афруза Ҳамдамова, Гулруҳбегим Тохиржонова, Умида Омонова ва Нилуфархон Имомқўзиева ўз партияларини ғалаба билан якунлашди. Бугун 2-турда Ўзбекистон - Қозоғистон қарама-қаршилигига гувоҳ бўламиз.  

ҚОЗОҒИСТОН — ЎЗБЕКИСТОН (Жуфтликлар)

Меруерт Камалиденова (IM 2400) — Афруза Ҳамдамова (WGM 2447)

Ксения Балабаева (WGM 2396) — Гулруҳбегим Тохиржонова (IM 2349)

Элназ Калиахмет (WIM 2383) — Умида Омонова (WGM 2310)

Зарина Нургалиева (WIM 2292) — Нилуфархон Имомқўзиева (WFM 2305)