Бразилияда онлайн-ставкалар тақиқланди. Мамлакат футболи 2027 йилда қанча пул йўқотишини ҳисоблаб чиқишди

CBF вакилининг Бразилия Федерал олий судидаги очиқ эшитувларда маълум қилишича, маҳаллий футболнинг 2027 йилдаги йўқотишлари тахминан 420 млн реални (қарийб 80 млн доллар) ташкил этади. Кейинги йилларда молиявий зарар янада ортиши мумкин.

Конфедерация маълумотларига кўра, букмекерлик компаниялари Бразилия чемпионатининг иккита юқори дивизионидаги 40 та клубдан 27 тасининг титул ҳомийлари ҳисобланади. Ушбу шартномаларнинг умумий қиймати тахминан 1 млрд реалга тенг бўлиб, бу жамоаларнинг барча ҳомийлик даромадларининг 35 фоизини ташкил қилади. CBF фикрича, букмекерларнинг кетиши ҳомийлик келишувлари қийматининг пасайишига олиб келади. Йўқотишларни қоплаш мақсадида клублар футболчиларни фаолроқ сотишга мажбур бўлишади ва бу трансфер бозорига ҳам ўз таъсирини ўтказади.

"Бутун Бразилия футболи учун қор уюми эффекти юзага келади. Бутун экотизим ўз қадрини йўқотади. Ҳукуматни аҳоли саломатлигини ҳимоя қилиш ва футболнинг иқтисодий манфаатларини ҳисобга оладиган мувозанатли ечим топишга чақирамиз", — дейилади конфедерация хабарида.

Эслатиб ўтамиз, 25 сентябрь куни Бразилия президенти Лула да Силва букмекерлик фаолияти ва қимор ўйинлари рекламасини тақиқловчи ҳужжатни имзолаган эди. 6 октябрдан бошлаб қонуний операторларнинг сайтлари ва иловалари ўз фаолиятини тўхтатди. Чекловлар жорий этилгунга қадар букмекерлар Бразилия А Сериясидаги 20 та клубдан 14 тасининг титул ҳомийси бўлиб келаётган эди.