11 ноя 23:47
Янгиликлар

Бокс/ММА

Иккала боксчимиз ҳам IV Ёшлар Олимпиадаси финалида! Қозоғистонлик рақиб мағлуб этилди

Сенегал пойтахти Дакар шаҳри мезбонлик қилаётган IV Ёзги Ёшлар Олимпия ўйинларининг бокс мусобақасида 1/2 финал жанглари ўтказилмоқда.

Хабар берганимиздек, боксчи қизларимиздан икки нафари ярим финалга етиб келган эди. Бироз аввал уларнинг ҳар иккиси ҳам ўз жангларида ишончли ғалабага эришиб, финал йўлланмасини қўлга киритди.

-54 кг вазн тоифасида юртимиз шарафини ҳимоя қилаётган Сабрина Чакоманова қозоғистонлик Марал Толепбергенни, -60 кг вазндаги вакиламиз Рушанабону Исоева эса мисрлик Менателла Ибраҳимни бир хил 5:0 ҳисобида доғда қолдирди.

Сабрина Чакоманованинг ҳал қилувчи финал жангидаги рақибаси Эвелин Трехос Салас бўлади. Колумбиялик бу боксчи 1/2 финалда япониялик Юра Канемаруни 5:0 ҳисобида енгди.

Рушанабону Исоеванинг Олимпиада чемпионлиги учун кечадиган баҳсдаги рақибаси Каролина Колларова бўлади. Словакиялик боксчи 1/2 финалда япониялик Аяно Мочини 4:1 ҳисобда мағлубиятга учратди.

Финал жанглари бугун, 12 ноябрь куни бўлиб ўтади.