Анвар Бойназаров ва Шоҳруҳ Холмуродов Karate Сombat 56 турнирида жанг ўтказди + ФОТО

Биз учун аҳамиятлиси, ушбу оқшом доирасида икки ҳамюртимиз ҳам ўз жангларини ўтказишди. Тажрибали Анвар Бойназаров ушбу Лигадаги ўзининг учинчи жангида бразилиялик 29 ёшли Даниэль Ласердани синовдан ўтказди. Жангнинг биринчи раунди якунланишига 7 сония қолган бир пайтда базаси таэквондо бўлган Ласерда 36 ёшли Бойназаровни техник нокаутга учратди. 

Бу Анвар Бойназаровнинг кетма-кет иккинчи мағлубияти бўлди. Ҳамюртимиз Karate Combat 53 турнирида аргентиналик Луис Геррерога ҳам нокаут эвазига имкониятни бой берганди. Энди унинг ҳисобида Karate Combat лигасида 1 та ғалаба 2 мағлубият бор. Даниэль Ласерда эса дебют жангидаёқ ёрқин ғалабани қўлга киритди.   

Karate Combat 56 турнири доирасида яна бир аралаш яккакураш устамиз ўз жангини ўтказди. Шоҳруҳ Холмуродов ҳам афсуски, украиналик Александер Крутцкихга очколар ҳисобига кўра имкониятни бой берди. Холмуродов жанговар каратэдаги дебют жангини Karate Combat 53 турнири доирасида америкалик Брайнэн Макиверга қарши ўтказиб, биринчи раундда техник нокаут эвазига зафар қучганди.