Арманистонлик Олимпиада совриндори, жаҳон ва Европа чемпиони Тошкентда + ФОТО

Юнон-рум кураши бўйича Лондон-2012 Олимпидаси кумуш медали совриндори, жаҳон ҳамда Европа чемпионатларининг олтин, кумуш ва бронза медаллари соҳиби, Қозон Универсиадаси вице-чемпиони, арманистонлик афсонавий курашчи Арам Жулфалакян пойтахтимизда меҳмон бўлиб турибди. 

Эътиборга молик жиҳати шундаки, Арам фаолиятидаги жаҳон чемпионатининг ягона олтин медалини айнан Тошкентда ўтган дунё биринчилигида қўлга киритган. Ўшанда у озарбайжонлик Элвин Мурсалиев (9:0), австриялик Флориан Мархл (12:1), мексикалик Хуан Эскобар (11:2), грузиялик Зураб Датунашвили (1:0) ҳамда ҳал қилувчи финал беллашувида хорватиялик Невен Жугай (4:0)ни мағлубиятга учратиб, шохсупанинг энг юқори поғонасига кўтарилган эди. Айнан Тошкентдаги жаҳон чемпионатида яна бир тарихий воқеа рўй берган. Буни мавриди келиб қолгани учун эслатиб кетамиз. Жаҳон чемпионати доирасида ўтказилган Конгрессда ФИЛА номи Бирлашган кураш дунёси (UWW)га ўзгартирилганди.     

Кеча Арам Жулфалакян пойтахтимизга ташрифи доирасида бир неча ўн йиллардан бери терма жамоаларимизга истеъдодли курашчиларни етказиб бериб келаётган Республика олимпия захиралари коллежида бўлди. Арманистонлик афсона коллежнинг кураш залида машғулот ўтказаётган ёш эркин ва юнон-рум курашчиларимиз билан учрашиб, улар билан бирга машғулот ҳам ўтказди. Жулфалакяннинг маҳорат сабоқларини ёшларимиз катта иштиёқ билан қабул қилишди ва табиийки, машғулот сўнггида суратга ҳам тушишди.