Асли ўзбекистонлик спортчи Илдар Ҳафизов АҚШ таркибида Пан-Америка ўйинлари ғолиби бўлди

Аҳамиятлиси, мусобақанинг юнон-рум кураши баҳсларида -60 кг вазн тоифасида асли ўзбекистонлик, 1988 йилнинг 30 январь куни Тошкентда туғилган Илдар Ҳафизов иштирок этди ва якунда АҚШ делагацияси ҳисобига олтин медални тақдим этди. Ҳамюртимиз финалда кубалик Кевин де Армасдан устун келган.

Ҳафизов АҚШ таркибида бунгача 2021 йилда Гватемаладаги Пан-Америка чемпионатида кумуш, 2019 йилда Перуда ўтказилган Пан-Америка ўйинларида бронза, 2017 йилда АҚШ чемпионатида олтин медални қўлга киритган.

У Ўзбекистон терма жамоаси сафида 2011 йилда Тошкентда ўтказилган Осиё чемпионатида кумуш ва 2007 йилда Бишкекда ўтган Осиё биринчилигида бронза медалини қўлга киритган.

Маълумот ўрнида, Чилида ўтган XIX Пан-Америка ўйинларида АҚШ делегацияси 124 та олтин, 75 та кумуш ҳамда 87 та бронза медали билан умумжамоа ҳисобида биринчи бўлди.