ATP Якуний турнирининг илк финалчиси маълум

Мусобақанинг илк ярим финал учрашувида дунёнинг саккизинчи ракеткаси бўлиб турган сербиялик Новак Жокович рейтингнинг тўққизинчи поғонасидан жой олган америкалик Тэйлор Фритцга қарши кортга чиқди. 

Бир соату 56 дақиқа давом этган баҳсда Новак рақибини иккала сетда ҳам тай-брекларда мағлуб этишни уддалади - 7/6(5), 7/6(6). Теннисчиларнинг ўзаро учрашувларидаги ҳисоб 6:0 кўринишига келди. Фритцга 15 та эйс зарбаси ҳам ёрдам бермаган. Жокович эса 4 та эйс, 1 та қўшхато ва 2 та брейк қайд этди. 

Шу тариқа ATP Finals турнирларининг беш карра ғолиби Новак Жокович фаолиятида саккизинчи бор ушбу нуфузли мусобақанинг финалида кортга чиқади. У сўнгги бор 2015 йилда бош совринни қўлга киритган бўлса, охирги маротаба 2018 йили финалда ўйнаганди. Жокович шунингдек, фаолиятидаги ATP таснифидаги 130-финалда иштирок этади. Бу кўрсаткич билан у Рафаэль Надалга тенглашиб олди.