Australian Open-2025. Эркаклар ўртасидаги жуфтлик баҳсларида чемпионлар маълум

Мусобақанинг эркаклар ўртасидаги жуфтлик баҳсларида чемпионлар аниқланди. Ҳал қилувчи финал учрашувида финляндиялик Харри Хелиоваара ва британиялик Генри Паттен жуфтлиги италияликлар Симоне Болелли ҳамда Андреа Вавассори ҳамкорлигини 6/7(16), 7/6(5), 6/3 ҳисобида енгиб, Australian Open 2025 чемпионига айланишди.

Уч соату 7 дақиқа давом этган баҳсда Хелиоваара/Паттен 11, Болелли/Вавассори жуфтлиги 6 та эйс зарбасини амалга оширган. Иккала жуфтлик ҳам 2 тадан қўшхатога йўл қўйган. Хелиоваара ва Паттен ҳамкорликда иккинчи "Катта Дубулға" турнири чемпионига айланишди. Улар ўтган йили Уимблдон турнирида ҳам бош совринни қўлга киритишганди. 

Харри ва Генри икки ҳафталик меҳнатлари эвазига 2000 рейтинг очкоси ҳамда 510,300 АҚШ доллари миқдорида мукофот пулига эга чиқишди. Болелли ва Вавассори эса 1200 очко ҳамда 277,200 долларга эга бўлишди.