Australian Open. Аёллар ўртасидаги финал учрашувида кичик "сенсация"

Бош соврин учун WTA рейтингида 14-поғонани эгаллаб турган америкалик Мэдисон Киз дунёнинг биринчи ракеткаси, мусобақанинг амалдаги чемпиони бўлиб келган беларуслик Арина Соболенкога қарши кортга чиқди. 

Икки соату икки дақиқа давом этган баҳсда Мэдисон номдор рақибасини 6/3, 2/6, 7/5 ҳисобларида мағлубиятга учратиб, Australian Open 2025 чемпионига айланди. Теннисчиларнинг ўзаро учрашувларида ҳамон Арина олдинда бормоқда - 4:2. Лекин муҳим баҳсда Киз шов-шувли тарзда ғалаба қозониб, фаолиятидаги илк "Катта Дубулға" совринини қўлга киритди. 

Киз учрашув давомида 6, Соболенко 3 та эйс зарбасини амалга оширди. Аринада қўшхатолар кўпайиб кетди - 5 га 0. Брейклар бўйича устунлик чемпион томонида бўлди - 4 га 3! Америкалик теннисчи бош соврин эгасига айланиши баробарида Соболенконинг Australian Open турниридаги 20 та учрашувдан иборат мағлубиятсиз сериясига ҳам барҳам берди. 

Киз - 2000 йилдан кейин Australian Open чемпиони бўлган бешинчи америкаликка айланди. Унгача Линдсей Дэвенпорт (2000), Женнифер Каприати (2001, 2002), Серена Уильямс (2003, 2005, 2007, 2009, 2010, 2015, 2017) ва София Кенин (2020) Австралия Очиқ чемпионати чемпиони бўлишган эди.

Бу Мэдисоннинг фаолиятидаги 10-титули бўлди. У кетма-кет 12 та учрашувда зафар қучди. Australian Open турниридан олдин Аделаидадаги мусобақада ҳам бош совринни қўлга киритганди.

Киз икки ҳафталик меҳнатидан 2000 рейтинг очкоси ва 2,2 миллион АҚШ доллари миқдорида мукофот пули ишлаб олди. Чемпионлик унвонини топширган Соболенко эса 1300 очко ҳамда 1,2 млн долларга эга чиқди. Australian Open якунларига кўра Киз дунёнинг еттинчи ракеткасига айланиб олади.