Аёллар ўртасидаги Рим турнирида финал якунига етмай чемпион аниқланди

Аёллар ўртасидаги Internazionali BNL d'Italia турнирининг ҳал қилувчи финал учрашувида дунёнинг иккинчи рақамли теннис маликаси, руминиялик Симона Халеп WTA рейтингининг тўртинчи поғонасидан жой олган чехиялик Каролина Плишковага қарши кортга чиқди. 

Биринчи сетда Халеп рақибасига ҳеч қандай имконият қолдирмади - 6/0. Иккинчи сетнинг учинчи геймидан сўнг Плишкова жароҳат сабаб баҳсни давом эттира олмаслигини маълум қилди. Бу вақтда Халеп 2/1 ҳисобида олдинда бораётганди. 

Шу тариқа, 32 дақиқа давом этган финал учрашуви иккинчи сетнинг учинчи геймидан сўнг тўхтатилди. Халеп ортиқча қийинчиликсиз Рим турнири бош совринини қўлга киритди. Бу Халепнинг кетма-кет қўлга киритган учинчи соврини бўлди. Бу галги ғалаба унга 205,190 евро ҳамда 900 рейтинг очкосини келтирди. Плишкова эса 150,000 евро ва 585 очкога эга бўлди. Халеп Римда фаолиятидаги 22-титулига эга чиқди.