Азизбек рингга кўтарилган оқшомнинг марказий жанги 10 раунд давом этди ФОТОГАЛЕРЕЯ

Оқшомнинг марказий жанги ярим оғир вазн тоифасида ўтказилиб, унда WBC ва IBF йўналишлари чемпиони россиялик Артур Бетербиев даъвогар боксчи, асли келиб чиқиши россиялик, ҳозирда Германия шарафини ҳимоя қилаётган Адам Дейнесга қарши рингга кўтарилди.

Ўн икки раундга мўлжалланган чемпионлик жанги муддатидан аввал якунланди. Ўнинчи раундда Бетербиев рақибини техник нокаут эвазига мағлубиятга учратди. Дейнес навбатдаги кучли зарбани ўтказиб юборганидан сўнг рефери жангни тўхтатди. Адам биринчи раунднинг ўзидаёқ нокдаун ҳолатига тушиб қолган эди. 

Артур 2019 йилнинг октябрь ойидан буён илк бор рингга кўтарилди. Ўшанда у украиналик Александр Гвоздикни мағлуб этиб, рақибининг WBC камарини тортиб олганди. Дейнес ҳам сўнгги жангини 2019 йилда ўтказиб, Евгений Махтиенкодан устун келганди.

Эътиборлиси, Артур илк бор Россия ҳудудида ўз жангини ўтказди. Бундан аввалги жангларнинг аксарияти Канадада ташкил этилганди. Бу Бетербиевнинг фаолиятидаги 16-ғалабаси бўлди. У барча жангларини нокаут билан якунлаган. Дейнес эса фаолиятидаги иккинчи мағлубиятини қабул қилиб олди.