Бел олиш ва уч кураш ассоциациясида 2020 йил якунлари сарҳисоб қилинди

Шунингдек, йиғилишда 2021 йил учун истиқболли режалари муҳокама қилинди. Йиғилишда ассоциация кенгаши аъзолари ва ҳудудлардаги барча бўлимларидан вакиллар ҳамда оммавий ахборот воситалари ходимлари иштирок этди.

Дастлаб ассоциация бош котиби Носир Азизов сўз олиб, ортда қолган 2020 йил мобайнида бел олиш ва уч курашни янада кенг оммалаштириш бўйича амалга оширилган ишлар, эришилган ютуқларга тўхталиб ўтди.

Шунингдек, 2021 йилда ўтказиладиган Республика миқёсидаги мусобақаларни юксак савияда ташкил этиш, Фарғона шаҳрида ўтиши режалаштирилаётган ёшлар ўртасидаги жаҳон чемпионатига пухта ҳозирлик кўриш ҳамда терма жамоа спортчиларининг муваффақиятли иштирокини таъминлаш, ўқув-машғулот йиғинларини ўтказиш, ўғил-қизларни спорт, хусусан, бел олиш ва уч курашга янада кенгроқ жалб этиш кераклиги ҳақида тўхталиб ўтди.

Бундан ташқари Н.Азизов Бутунжаҳон белбоғли кураш ва бел олиш кураш ассоциацияси раиси Маъруфжон Зарипов томонидан кўрсатилаётган амалий ёрдам ва яқин ҳамкорлик ҳақида ҳам алоҳида тўхталиб ўтди.

Шундан сўнг, кенгаш аъзолари ва вилоятлардаги вакилларнинг истиқболдаги режалари, таклиф ва фикрлари тингланди. Йиғилиш якунида барча иштирокчиларнинг 2020 йилдаги самарали меҳнати эътироф этилиб, ассоциациянинг ташаккурнома ва эсдалик совғалари билан тақдирланишди.