Белград. Ҳозирча Россияда икки нафар финалчи ва бир йўқотиш бор

Россиянинг 5 нафар боксчиси ярим финалга йўл олган эди. Ҳозирча уларнинг уч нафар вакили рингга кўтарилди. Шулардан иккитаси финал йўлланмасини нақд қилди ва бир боксчи бронза медали билан чекланди.

-75 кг вазн тоифасидаги Жамбулат Бижамов таиландлик Верапон Жонгжохони муддатидан аввал мағлуб этди. Иккинчи раундда Жонгжохонинг мураббийлари реферидан жангни тўхтатишни сўраб рингга сочиқ отди.

Бижамов финалда кубалик Эрнандез Йоенлис билан тўқнаш келади.

Чорак финалда таиландлик боксчига ҳамюртимиз Саиджамшид Жафаровнинг ғалабаси бериб юборилган эди.

+92 кг вазн тоифасидаги Марк Петровский Тринидад ва Табаго вакили Паул Нигелни ярим финалда қолдириб кетди. Петровский чемпионлик учун арманистонлик Давид Чалаёнга қарши жанг қилади.

-51 кг вазнли россиялик Ахтем Закиров эса АҚШ боксчиси Роско Ҳиллга 5:0 ҳисобида имкониятни бой берди ва бронза медалини қўлга киритди.