Bellator 286: Питбуль камарини ҳимоя қилди, Мамедовда ғалаба ва бошқа натижалар

Bellator 286 оқшомининг марказий жангида ярим енгил вазн тоифасида амалдаги Bellator чемпиони Патрисио "Питбуль" Фрейре рейтингда иккинчи ўринда бораётган даъвогар Адам Боричга қарши октагонга кўтарилди. Жанг тўлиқ беш раунд давом этди ва якунда бразилиялик чемпиони 48-47, 49-46, 50-45 ҳисобида ғалаба қозонди. Питбуль шу йилнинг апрель ойида Эй Жей МакКига қарши кечган реванш жангида камарини қайтариб олганди.

Эй Жей МакКи айнан кечаги турнирда ҳам октагонга кўтарилди. У енгил вазн тоифасида дебют қилди ва Спайк Карлайлни очколар (29-26, 30-26, 30-27) ҳисобига кўра мағлубиятга учратди. 

Қолган натижаларга тўхталадиган бўлсак, россиялик аралаш яккакураш усталари Ислам Мамедов ва Халид Муртазалиев навбатдаги ғалабаларини тантана қилишди. Мамедов уч раунд якунига кўра америкалик Ник Браунни 30-27, 30-27, 30-27 ҳисобларида енгди. Муртазалиев эса иккинчи раундда АҚШ шарафини ҳимоя қилаётган Хажимурат Бестаевни техник нокаутга учратди. Яна бир Россия вакили Владимир Токов эса Янги Зеландия жангчиси Жей Жей Уилсонга ютқазиб қўйди.