Бердимуратов финалда, Ортиқбоев жаҳон чемпионати совриндори!

Дунё биринчилиги юнон-рум кураши баҳслари билан бошланган эди. Ҳамюртимиз Жасурбек Ортиқбоев жаҳон чемпионатининг бронза медалини қўлга киритди. 55 кг вазн тоифасида юртимиз шарафини ҳимоя қилган вакилимиз бронза медали учун кечган беллашувда қозоғистонлик Амангали Бекболатовдан 9-5 ҳисобида устун келди. 

Қувонарлиси, 82 кг вазнда курашган Жалгасбай Бердимуратов бугун жаҳон чемпионатининг олтин медали учун гиламга чиқиш ҳуқуқини қўлга киритди. Токио Олимпиадаси иштирокчиси, Ислом бирдамлиги ўйинлари ғолиби илк даврада қозоғистонлик Диас Кален, 1/8 финалда хитойлик Вонг Ченгву, 1/4 финалда озарбайжонлик Рафиг Ҳусейнов, 1/2 финалда эса венгриялик Тамаш Леваини мағлубиятга учратди. Бугун Бердимуратов жаҳон чемпионлиги учун кечадиган финал баҳсида туркиялик Бурхан Акбудакка қарши гиламга чиқади.     

Ҳамюртларимиздан 63 кг вазнда курашган Тўрабек Тиркашев илк даврадаёқ хорватиялик Иван Лизатовичша 1-8, 67 кг вазндаги Аброр Атабаев 1/8 финалда грузиялик Жони Хецурианига 1-4, 72 кг вазнда гиламга чиққан Мирзобек Раҳматов илк босқичда финляндиялик Лисакки Липастига, Арам Варданян (77 кг) кореялик Хюн Ву Кимга 0-6, Нурбек Хошимбеков (87 кг) биринчи даврада болгариялик Йоан Димитровга 0-5, Рустам Ассакалов (97 кг) 1/4 финалда эронлик Абдуллоҳ Саравига 0-7 ҳисобида имкониятни бой бериб қўйди.