Беш нафар шахматчимиз юз фоизлик натижа қайд этмоқда

Бу йил ўз тарихида 18-маротаба ташкил этилаётган, мукофот жамғармаси 75 000 АҚШ долларини ташкил қилувчи турнир швейцарча тизимда 10 турдан иборат бўлади. Иштирокчилар икки гуруҳда совринли ўринлар учун баҳс олиб боришяпти. Асосий ҳисобланган А гуруҳида 1800 ва ундан юқори рейтингли шахматчилар жам бўлган. В гуруҳида эса рейтинги 1999 ва ундан паст бўлган иштирокчилар дона сурмоқда. 

Кучлилар жам бўлган А гуруҳида ҳиндистонлик халқаро гроссмейстер Ниҳал Сарин (2687) биринчи рақам остида сараланган. У 1-турда ҳамюртимиз Беҳруз Умаров (2218)дан устун келганди. Иккинчи турда эса очко йўқотди. Сарин мўғулистонлик Сумия Чингуун билан дуранг ўйнади. Иккинчи рақамли шахматчи сифатида таснифланган ёш гроссмейстеримиз Шамсиддин Воҳидов (2670) кутилмаган натижалари иккинчи турда ҳам давом этди. У оқ доналарда ўйнашига қарамай, рейтингда ўзидан анча қуйида бораётган россиялик Михаил Панин (2189)ни мағлуб эта олмади. 

Гроссмейстеримиз Муҳиддин Мадаминов (2550) россиялик Семен Новожилов (2344) билан муросага келди. Иккинчи турдан кейин 5 нафар шахматчимиз юз фоизлик натижа билан пешқадамлар сафида боришяпти. Алмас Раҳматуллаев, Абдумалик Абдусалимов, Сайидакбар Сайдалиев, Ҳумоюн Бегмуратов ва Муҳаммадзоҳид Суяров ҳар икки турда ҳам рақибларини мағлубиятга учратишди. 

Гроссмейстерларимиздан бири Ортиқ Ниғматов (2501) кутилмаганда россиялик Дмитрий Ростовцев (2292)га ютқазиб қўйди. Учинчи тур олдидан венгриялик гроссмейстер Санан Сюгиров (2631) қўшимча кўрсаткичларга кўра пешқадамлик қиляпти. Жами 21 нафар шахматчи ҳали очко йўқотмаган. Бугун 3-тур учрашувлари соат 15:00да бошланади.